ومن «السف» ما قتل

- من أكتر الحاجات اللي بتأثر بشكل سلبي على رغبتنا في المذاكرة، واللي أغلبنا مبياخدش باله منها.. هي السف على المذاكرة!
..
أنا هقولك.. ...
- كل ما بتذكر مساوئ نظام التعليم الفاشل والمنحدر، وأساليب الدكاترة التعسفية في محاسبة الطلاب، الركون دايمًا للفشل.. بمعنى الساركازم اللي بيتعمل دايمًا عن الطلاب الفاشلين.. اللي هما بيغشوا في الامتحان.. او اللي كاتبين اجابة ملهاش علاقة بالسؤال.. او حتى اللي بيفتكر أغنية عمرو دياب في اللجنة..
..
- كل اللي فات ده حرفيًا " كارثة "!
أنت متخيل أنت بتقول لعقلك إيه؟! ..
1- أنا هذاكر ليه في نظام تعليمي فاشل؟
2- أنا هذاكر ليه طالما كده كده الدكتور هيسقطني؟
3- أنا هذاكر ليه طالما هنسى وهفتكر عمرو دياب في الامتحان؟
.. فبالتالي تكون الإجابة الطبيعية، المذاكرة ملهاش أي لازمة في وسط كل ده.. يعني هما اللي ذاكروا أخدوا إيه؟!
..
- الأمور بتتطور لحد إنك مش بس بتشوف السف على المذاكرة وتسكت، لا ده أنت بتدخل الكارير كمان وبتبقى فرحان جدًا وأنت شغال شتيمة في التعليم على الدكاترة على النسيان..
..
- بعد كل ده طبيعي جدًا إن عقلك يقف! .. مفيش مذاكرة.. كويس إنك بتروح الإمتحان أصلًا!! .
..
= طب والحل؟
..
- هقولك.
بس الأول عايزك تعرف إني مبنكرش كل الكلام اللي قولته فوق ده، ومقدر وضع التعليم، ولكن الكلام مش هيفيد بحاجه، بالعكس هيضر بحيث إنك لا هتذاكر ولا التعليم هيتظبط!!
..
- الحل:-
* المنطق بيقول، إغلاق مصادر الطاقة السلبية دي، واللي هي السوشيال ميديا بكل أنواعها للأسف بتنشر السم ده! ، ولكن الواقع بيقول، إنك صعب جدًا تبعد عن السوشيال ميديا خصوصًا في الزمن ده اللي بقى كل التعامل فيه من خلالها.
|| إذًا ||
الحل في 3 خطوات..
1- التقليل من السوشيال ميديا تدريجيًا، ودخولها على قد إنك تشوف الدكتور نزل حاجه، أو قال حاجه جديدة ولا لا، يعني تقليل تصفحك للسوشيال ميديا على سبيل الترفيه.
..
2- بطل سف على المذاكرة ✋.. أرجوك.. أنت بتضر نفسك.. والتعليم مش هيتصلح حاله والله.. وأنت تعافر علشان تحقق حاجه في التعليم ده، ده شيء هيحسبلك، لكن تبقى فاشل وتقول ده التعليم، ده شيء هيحسب عليك قطعًا.
..
3- أخيرًا بقى، أفتكر الدافع اللي بتذاكر علشانه، تبقى الاول؟ .. تكمل في الكلية؟ .. تلاقي شغل كويس؟ .. تلاقي منح كويسة؟ ..
= طب هو أنا مش لاقي دافع 🙄..
- بلاش كل ده، افتكر والديك بيتعبوا معاك إزاي..
هتستخسر يوم يفرحوا بيك فيه؟!
[ كفاية كلام سلبي وتقطيم لنفسك وللناس ]
Go On ✊